因為想睇哩本書才上 Amazon，今日睇咗一半。挑燈夜讀，兩日哽完本書。

二戰結束，日本投降，國民黨代表中國位列勝利國，國家百廢待興，人民渴求和平。美國佬想中國和平統一成為民主國家以防蘇共影響力擴大，尤其邱吉爾提出鐵幕新冷戰 ，遂派出二戰大功臣參謀長馬歇爾使華，促使國共和談。 蘇共當時忙於東歐及中東利益，又唔信中共可以跑出，加上蔣介石同意外蒙獨立，蘇共覺得安全有保障，遂無意強撑中共。形勢有利蔣介石，毛澤東最初亦只是尋求新政府下共產黨的生存空間。

和談的關鍵係要國民黨放棄一黨專政，要共產黨放棄軍隊指揮權。馬歇爾憑著佢嘅威望同手腕，開初很順利，國共都肯退讓。

但歷史係點樣轉軋跡呢？

馬歇爾何許人？ 二戰時美軍的參謀長（Chief of Staff）， 佢提拔嘅將軍包括巴頓、艾森豪、麥克阿瑟，運籌帷幄美國物資嘅供應，被美國以至盟軍視為二戰勝利嘅最大功臣！ 戰後歐洲的復興計劃，由佢主持，又以佢命名，亦因此贏得諾貝爾和平獎。

二戰時佢制訂美軍嘅策略係先對抗德國，之後才對付日本，任由中國苦苦抗戰。 二戰甫結束，佢本來可以好好退休，但係佢接受使華任務，或者係對中國有一份情意結。

任務係促進國共和談，建立一個民主中國，並且避免中國成為共產主義國家。

馬歇爾認為國共內戰會拖好長，苦咗人民，最好係和平建立議會式民主政治體系，國民黨執政，共產黨有效制衡，消弭共產主義於無形，又防國民黨一黨專政。

佢嘅如意算盤好難打得響，因為遇到一個剛愎自用嘅蔣介石同一個機會主義嘅毛澤東。 蔣介石根本係一心諗住消滅共產黨，而毛澤東就係利用／製造機會攞最大嘅利益。

國民黨嘅失敗真係同蔣介石性格有關，馬歇爾開初係壓得住共產黨，如果蔣肯先收編共產黨入政治體制，歷史就唔係咁寫。偏偏蔣自以為是，令國民黨跌入東北泥沼，犯咗佢打贏日本嘅策略，最終失去大陸。

當然本書係美國佬嘅觀點去睇果段歷史，但至少好多係公開資料，國共雙方都唔會公開當日嘅資料。

係咪坐係高位又冇制衡嘅中國人都會剛愎自用，我諗起永遠冇錯嘅林奠同天下圍中嘅習帝。